شهرة زيت الفلفل الحار أو (Chili Oil) ابتدت تزيد بآخر كام سنة. تحديداً بالبلدان اللي ما عندهم ثقافة الشطّة. زيت الفلفل الحار جزء مهم من المطبخ الصيني، الفييتنامي و بشكل عام بالمطبخ الشرق الآسيوي. نقدر نقول إنه زيت الفلفل الحار هو شطة صينية و تُقدم بجانب معظم الأطباق لتضيف نكهة و شوية حار. موضوعها سهل جداً، ثلاث مكونات أساسية: زيت نباتي بطعم معتدل، فلفل أحمر مجروش و عطريات و منكّهات مثل البهارات الصحيحة و الخضار. كل الوصفات تقدروا تعدلوها بحسب النكهات اللي تحبوها.
ثلاث أسباب لتجربة وصفتنا لليوم
- زيت الفلفل الحار ينفع كإضافة لأي طبق رئيسي أو جانبي. للحمص أو اللبنة مثلاً، على ساندوتش جبنة بيضا أو لأطباق الرز و مع كل اللحوم
- الوصفة تجهز بعشر دقائق
- مكونات زيت الفلفل الحار الأساسية موجودة بأي بيت. بس ممكن تجيبوا بهارات خصوصية من محلات السوبرماركت الآسيوية لتجربة نكهات جديدة مثل فلفل السيشوان اللي أضفناه لوصفتنا. و هالمكونات كلها لها تاريخ صلاحية طويل
المكونات
مثل ما قلنا، ثلاث مكونات أساسية: زيت نباتي، فلفل أحمر مجروش و المنكّهات.
الزيت النباتي لازم يكون بطعم مُعتدل. يعني زيت كانولا أو عبّاد الشمس، و اتجنبوا زيوت بطعم قوي مثل زيت الزيتون أو زيت جوز الهند.
الفلفل المجروش تلاقوه بسهولة بكل محلات السوبرماركت. متواجد إمّا بقسم البهارات أو القسم الآسيوي. كل أنواع الفلفل المجروش تنفع لهالوصفة. بس لو بتلاقوا فلفل بنوعية ممتازة ما رح تندموا. الفلفل اللي ينباع للأطباق الإيطالية ممكن ياخد لون زيادة عند إضافة الزيت الساخن لوجود نسبة قشور أعلى فيه بينما الفلفل اللي تلاقوه بالمحلات الآسيوية فيه نسبة بذور عالية يحافظ على لون أحمر و يعطي طعم رائع.
المُنكِّهات: بوصفتنا اليوم نكّهنا الزيت بالثوم و إضافات مختلفة مثل الكزبرة و الصويا صوص. تقدروا تشيلوا و تحطّوا اللي تحبوه بالزيت. مثلاً كل الوصفات اللي جربناها كان فيها يانسون و أعواد قرفة. مع التجربة لقينا انهم بيظغوا على النكهات الثانية و قررنا نشيلهم من وصفتنا النهائية، اللي هي برأينا و بكل تواضع أحسن وصفة جربناها لليوم. من المكونات الثانية اللي ممكن استخدامها:
- هيل
- زنجبيل
- بصل
- بذور سمسم سوداء
- أعواد قرفة
- عشبة العطرة
- شومر
ملاحظات لوصفة الزيت بالفلفل الحار
- رح تلاقوا انه استعملنا ٤ أنواع مختلفة من الفلفل الحار. الفلفل التايلندي اللي تلاقوه بالسوق بسهوله هو أكثر نوح حار فيهم. طبعاً يُفضل تستخدموا نفس الكوكتيل بس لو حبّيتوا، شيلو و زيدوا أنواع الفلفل اللي بتفضلوها.
- الفلفل الأحمر الجروش هو المكوّن الأساسي لوصفة الزيت بالفلفل الحار. يعني مش غريب لمّا نطلب منكم تتأنوا لما تشتروه لهالوصفة. النوع الموجود بكل محلات السوبرماركت منيح و ينفع لوصفتنا، بس هو أساساً تكون نسبة القشور فيه عالية و بالتالي ياخد لون زيادة لمّا نضيفله الزيت الحامي. ممكن تلاقو أنواع أحسن للفلفل الأحمر المجروش بالمحلات الآسيوية. يكون فيها نسبة البذور أعلى و بتحافظ على لون أجمل و بتعطي نكهة أحسن.
- لا تسخنوا الزيت زيادة. لو عندكم ميزان مطبخ ما يزيد الزيت عن درجة حرارة 110°-120°C لأنه لو حرارته أعلى رح يحرق المكونات. لو ميزان الحرارة مش متوفر ارموا ذرة ثوم بالزيت للتأكدوا. لو تفاعلت مع الحرارة و عملت طشّة بكون الزيت جاهز.
مكونات وصفتنا اليوم
كيف نعمل زيت الفلفل الحار
ثلاث خطوات بسيطة: نحط الفلفل و المنكّهات بمرطبان، نسخّن زيت نباتي مع مكعب مرقة نباتي، و آخر شي نضيف الزيت الحامي للمرطبان و نخليه يشتغل شغله.
نضع الثوم المهروس بالرطبان مع المكونات اللي نفضّلها: ملعقتين كبار فلفل أحمر مجروش+ 5 قرون فلفل كامل ناشف+ ورقتين غار+ 3 قرون فلفل طازج مفروم+ 1.5 م.ك فلفل سيشوان+ ١ م.ص. كزبرة ناشفة+ 1.5 م.ك صويا صوص + م.ك سمسم + 1/2 م.ص من السكّر لمعادلة هالنكهات كلها.
نحمّي كوب الزيت على نار متوسطة و نذوّب فيه ¾ مكعب مرقة نباتي.
عندما يوصل الزيت درجة حرارة 110°-C120° سيليسيوس نصبه فوق موادنا و نخليه يبرد تماما قبل ما نسكّر الرطبان بإحكام
بعد ساعتين رح تلاقو لون الزيت اتحول للون أحمر كتير حلو و يكون الزيت بالفلفل الحار صار جاهز لكل الإستخدامات.
لو جرّبتو وصفتنا لليوم اتركولنا تعليق بآرائكم و اعملولنا تاغ عالنستغرام لصور الوصفة #thetablediaries
الزيت بالفلفل الحار مع الثوم
المقادير
- 5 قرون فلفل كامل ناشف
- 2 ورق غار
- 3 قرون فلفل طازج مفروم
- 1.5 م.ك فلفل سيشوان
- 1 م.ص. كزبرة ناشفة
- 1.5 م.ك صويا صوص
- 1 م.ك سمسم
- ½ م.ص. سكّر
- 1 راص ثوم المهروس
- 2 م.ك فلفل أحمر مجروش
- 1.5 كوب زيت نباتي
- ¾ مكعب مرقة نباتي
الخطوات
- نحمّي كوب و نصف من الزيت على نار متوسطة
- نضع كل المكوّنات بإستثناء مكعب المرق بمرطبان جاف نضيف سعة كوبين أو أكثر. استخدموا مرطبان يُغلَق بإحكام
- نذوّب ¾ مكعب مرق بالزيت بعد أن يسخن قليلاً مع مراعاة عدم زيادة حرارة الزيت
- نصب الزيت بداخل المرطبان على أن لا تزيد حرارته عن 110°C120°-C.
- نترك الزيت ليبرد تماماً قبل إغلاقه بإحكام و حفظه بالبراد. بعد ساعتين يتغّير لون الزيت للون أحمر.
- يُحفظ بالبرّاد لمدة اسبوعين