طريقة عمل خبز الفوكاشيا مع الطماطم الكرزية و جبنة الموزاريلا

1.3K

خبرو جيرانكم و جيران جيرانكم انه وصفة الفوكاشيا وصلت. و الطريقة ولا أسهل. بس ناقص يخبز حالو.

الخبز، العيش، (كربوهيدرات السعادة) تلم العيلة أكثر من أي صينية ورق عنب أو خروف محشي. اللي فيكم يقاوم الخبز يتفضل يروح على وصفاتنا الرشيقة لانه اليوم الحوار كله عن الخبز و ما يجلبه من إبتسامات و فرحة.

وصفتنا اليوم هي خبز الفوكاشيا. و اللي هو فعليا أحسن نوع للي يحب يجرب يخبز لأول مرة. الطريقة تاخذ وقت و يبغاله صبر بس معظم الوقت يكون للعجينة ترتاح. يعني زي ما تقولوا رح تتركوا العجينة معظم الوقت لوحدها، رح نطلطل عليها كل شوية: نعملها مساج و شوية حركات و الباقي شغال لوحده. بس برضه يفضل تختاروا يوم عارفين انكم بالبيت لانه غالبا رح تزوروا العجينة كل ساعة.

ملحوظة تانية ليه نحب هالوصفة؟ لانه نقدر نغيرها زي ما نحب. تحبو الثوم؟ رشوها ثوم. نحب الحار؟ هاتو الفلفل و لهلبوها. جبنة؟ من الجبنة البيضا للبرمزان كله ينفع. انا شفت ناس يزينو الفوكاشيا بسلطة والله زي ما بقلكم.

تخمير ليلي أو تخمير مستعجل

للأمانة، وصفات الفوكاشيا بشكل عام تشبه بعضها بالمكونات الاساسية. اللي يختلف فقط هو طريقة التخمير و الإضافات. من المؤكد انه لو نترك العجينة تتخمر لوقت طويل لليلة كاملة -متل ما ينصح بعض الخبازين-، النتيجة تكون طعم أغنى نوعا ما و العجينة تكون فيها فقاعات أكثر و هو من العوامل الاساسية للفوكاشيا الروعة. بس وقت اللي بدنا نعمل فوكاشيا، بنعتقد انه رح نفضل لو نعمله و ناكله بنفس اليوم بلا وجع قلب و انتظار. لهالسبب قررنا بعد ما جربنا كل الاحتمالات بمطبخنا انه نقدم لكم هالوصفة اللي فيها انتظار اقل و بنفس الوقت الطعم لا يقاوم متل خبز معمول بمخبز ايطالي عريق. نحن جربنا كل اوقات التخمير (ساعة، ساعتين، الليلي) و لاقينا هالطريقة ممتازة و مثالية.

الإضافات:

طبعا الاضافات على الفوكاشيا بتاخد كتير احتمالات. من ابسط شي (زيت زيتون و ملح) لاضافات غنية مثل الاجبان و اللحوم، او اضافات طازجة مثل الخضراوات.

  • الزيتون
  • طماطم مجففة
  • ثوم – روزماري
  • بصل (مكرمل او طازج)
  • اعشاب طازجة: زعتر – ريحان – روزماري – ميرمية
  • جبنة بارميزان
  • زعتر ناشف

و بعد الكوفيد و القعدة بالبيت، الفوكاشيا و ابداعاتها عالانترنت ما وقفت. وصلت للفواكه و الجرجير. بمعنى آخر، ما تخلو شي بنفسكم و جربوا اللي تحبوه.

المكونات اللي نحتاجها لعمل الفوكاشيا :

حكينا كتير، صار وقت التنفيذ:

نضع طحين و الخميرة (استخدمنا الفورية) بوعاء كبير و نخلطهم سوا باليد. نحفر حفرة بالوسط و نترك الوعاء عجنب.

بكاسة (او زبدية او صحن غويط) نضع ماء دافئ. حوالي 38-40°C درجة سيلسيوس (استخدموا ميزان حرارة المطبخ او اصابعكم. المي ما لازم تكون سخنة، دافئة يعني تقدروا تخلوا أصابعكم فيها من غير انزعاج، لانه لو درجة الحرارة العالية تقتل الخميرة و يُفشل العملية كلها). نضيف الملح للماء و نحطها بالحفرة اللي عملناها بالطحين. نرش ملعقتين طعام (بالمكيال) زيت زيتون و بالتدريج و باستخدام الأصابع نخلط المواد الجافة (الطحين و الخميرة) مع الماء لحد ما يتكوّن عجينة مبلولة و لزجة نوعا ما.

التخميرة الاولى: نضع زيت زيتون بوعاء حجم وسط (بس اكبر من حجم العجينة مرتين لثلاث مرات) و  نضع العجينة جواته. ركزوا معنا شوي هنا، تخيلو العجينة مقسمة من سطحها لاربع اقسام، نسحب الربع الأول و نطويه على العجينة للمنتصف، و نستمر بهالعملية مع الثلاث ارباع اللي فضلولنا لحد ما تاخدوا لفة دائرية على كل العجين لفة واحدة. نغطي العجين بمنشفة مطبخ رطبة لمدة 20 دقيقة. بعد عشرين دقيقة نكرر نفس حركات الطوي لكل ربع بس هالمرة نعملها ثلاث لأربع مرات. العجينة رح يتغير شكلها و تصير متل الطابة الملساء و ما تنحني بسهولة لوخزة الأصابع). اخيرا نغطيها لمدة ساعة*. يفضل دايما و لاي نو ع عجينة انه نتركها تتخمر بغرفة دافئة و من غير تكييف. لو البيت بارد من التكييف حطوها برة لتخمر. طريقة تانية تقدروا تحطوها بفرن مطفي بس مع الضو الداخلي ليكون دافي.  *للتخمير الليلي لو تحبوا تجربوا التخمير الليلي، بعد خطوة الطوي بالفقرة فوق تحطوا العجينة بالبراد على طول. و تاني يوم تكملوا الشغل من خطوة (التخميرة الثالثة بصينية الخَبز) 

بعد أول عشرين دقيقة

التخميرة الثانية: فاكرين حركة طوي العجينة علي نفسها؟ نعيد الحركة مرة تانية 3 لفات و لو حسينا العجينة مش مزيتة نضيف ملعقة لملعقتين طعام زيت زيتون. نغطي العجين ساعة كمان. بعد هالساعة العجينة المفروض تكون صارت قد حجمها الأصلي مرتين أو اكثر. لو ما صار هالشي نتركها نص ساعة كمان. و طبعا مكان التخمير يكون دافي و مش بالتكييف مثل ما قلنا قبل.

التخميرة الثالثة (بصينية الخبز): نحضر صينية 23×29  سم (9×13 انش) و نغطيها بزيت الزيتون قبل ما نضع العجين (حوالي ملعقتين طعام زيت). بالراحة كده و على مهل نحط العجينة لمصيرها الاخير بس شوي شوي ما بدنا نضيّع كل الشغل و الفقاقيع اللي صارت بالعجين بعد كل هالتخمير. نزيت اصابعنا و نبتدي نفرد العجينة (على مهل برضو) لتغطي كل الصينية. لو العجينة كانت عنيدة و ترجع محلها بعد الفرد (صارت معنا) نغطيها كمان ١٠ دقايق. الهدف العجينة توصل لكل اطراف الصينية و تغطيها كليا. لما نوصل لهالمرحلة بدنا نغطيها بمنشفة مطبخ رطبة لمدة ساعة. 

التخميرة الاخيرة:  بكاسة نضع ماء مملح، نبلبل اصابعنا بالماء و (بالراحة) نعمل حفر باصابعنا بالعجين (غمازات) لكل الصينية و نغطي مرة اخيرة لمدة 20-30 دقيقة بمكان دافي بينما الفرن عم يحمى. نحميه 230 درجة بهال 20 دقيقة. هانت والله، رح نخلص. العجينة رح تلاقوها كبرت مرة تانية و صلت لنص الصينية أو أكثر.

نرش الطماطم الكرزية المقطعة لأرباع ب٣ ملاعق طعام زيت زيتون و نصف ملعقة صغيرة ملح خشن. بعد 30 دقبقة نرفع منشفة المطبخ عن صينية العجين. المفروض تكون تمددت و وصلت نص الصينية او آكثر. لو حسيتوا يلزمها وقت آكثر اتركوها شوي لتوصل للمنتصف. نوزع الطماطم على العجين بداخل الغمازات و أخيراً نرش زيت الزيتون المتبقي من خليط الطماطم و زيادة كمان شوي زيت زيتون فوق العجين مع رشة ملح.

الخبز: خمرنا العجينة ما مجموعه 3 ساعات و نصف؟ الخَبز ولا اهين و اسهل. 15-20 دقيقة بس و الفوكاشيا تكون جاهزة. للتأكيد درجة حرارته الداخلية تكون 85 سيليسيوس لو عندك ميزان مطبخ (و لو ما عندك ميزان مطبخ لو سمحتوا جيبوا ميزان مطبخ لانه رخيص و مُفيد جدا). اول ما تطلع الفوكاشيا من الفرن و هي ساخنة جدا حطينا شقف الموزاريلا و خليناها تدوب مع حرارة الخبز. رشة زيت زيتون و ملح خشن عشان الحبايب و صحتين و هنا.

جربتو هالوصفة؟ اتركولنا تعليق و خبرونا رايكم. و لو اتفاخرتو عالسوشال ميديا اعملولنا تاغ #thetablediaries و خبرونا شو كانت اضافاتكم.

خبز الفوكاشيا مع الطماطم الكرزية و الموزاريلا الطازجة

عدد الحصص 10 اشخاص
وقت الإعداد 30 minutes
وقت التخمير 3 hours 20 minutes
الوقت الكلي 3 hours 50 minutes

المقادير

  • 600 غرام طحين متعدد الاستعمالات اربع اكواب و نصف
  • 2 ملعة طعام زيت زيتون
  • ¼ ملعقة شاي خميرة فورية او ناشفة
  • 2 كوب ماء دافئ ٣٨ – ٤٠° سيليسيوس
  • ¾ ملعقة شاي ملح خشن
  • ١ 235g جبنة موزاريلا

للاضافات

  • 150 غرام طماطم كرزية مقطعة ارباع كوب
  • ½ ملعقة شاي ملح خشن
  • 3 ملعة طعام زيت زيتون

للخبز

  • 2-3 ملعة طعام زيت زيتون لتزييت الصينية و العجينة قبل الخبز

الخطوات

  • بوعاء غميق نخلط الطحين و الخميرة و نحفر حفرة بالوسط
  • نذوب الملح بالماء الدافئ و نضع الماء بالحفرة. نرش ملعقتين زيت زيتون و نخلط المكونات الجافة مع الماء بالتدريح لنكون عجينة لزجة نوعا ما. بحالة العجين لم تكن رطبة كما موضح بالصورة، تتم اضافة ملعة ماء للوصول للنتيجة المرجوّة. انواع الطحين المختلفة قد يؤدي للفروقات. النتيجة بهذه الخطوة لازم تكون عجينة طرية و لزجة

التخميرة الاولى

  •  نضع زيت زيتون بوعاء حجم وسط و نضع العجينة بالوعاء. نسحب ربع العجينة و نطويها على باقي العجبن و نستمر لكل الارباع الباقية. نغطي العجين بمنشفة مطبخ رطبة لمدة 20 دقيقة. نكرر عملية طي العجين دائريا ثلاث مرات. تصبح العجينة متل الطابة الملسا و لا تنحني بسهولة لوخزة الاصابع. نغطيها لمدة ساعة بمنشفة رطبة.
    *للتخمير الليلي: يرجى مراجعة الملاحظات بالأسفل للتخمير الليلي

التخميرة الثانية

  • بعد ساعة  نعيد سحب و طي العجينة بشكل دائري لثلاث دورات. نضيف زيت الزيتون حسب الحاجة نغطيها لمدة ساعة تانبة بمنشفة رطبة. بعد التخميرة الثانية يكون حجم العجينة ضعف حجمها الأصلي. نتركها نصف ساعة اضافية بحالة لم تكبر كما يلزم.

التخميرة الثالثة (بصينية الخبز)

  • نحضر صينية 23×29 سم  (9×13 انش) نغطيها بزيت الزيتون، نطوي العجينة ارباع لمرة اخيرة و بهدوء نضعها بالصينية. نغطي اصابعنا بزيت زيتون و نفرد العجينة بسلاسة لتغطي الصينية. لو العجينة ردت لمكانها بعد الفرد نتركها ١٠ دقائق و نجرب مرة تانية. بعد ما تغطي العجينة الصينية كاملا نغطيها لتخمر ساعة.

التخميرة الاخيرة

  • نبلل اصابعنا بماء مالح و نعمل غمازات بالعجين يكون شكلها كما بالصورة. نحمي الفرن لدرجة حرارة 230 مئوية و نترك العجينة مغطاة بينما يسخن الفرن. بعد ال20 دقيقة تلاحظو العجينة كبرت بالصينية مرة أخيرة.
  • نرش الطماطم الكرزية بزيت الزيتون و الملح و نضع الخليط فوق العجين، نوزع الطماطم بداخل الغمازات. نرش ما تبقى من الزيت و رشة ملح أخيرة قبل الخبز.
    نخبز من 15-20 دقيقة. الخبز يجهز عندما تتكون طبقة ذهبية على السطح. للتأكد و بحالة وجود ميزان طعام، درجة الحرارة الداخلية يجب ان تتخطى 85° سيليسيوس
  • بينما الفوكاشيا لا تزال سخنة، نقطع الموزاريلا و نوزعها على سطح الخبز لتذوب. و صحتين و عافية
الوجبة: Bread
المطبخ: Italian

انضمام إلى المحادثة

  1. شرح مفصل ما شالله يعطيكم العافيه

    1. الله يعافيك يا رب و شكراً لمرورك و للتعليق

اترك تعليقاً

Your email address will not be published. Required fields are marked *

تقييم الوصفة




Close
© 2022 حكايات طاوله. كل الحقوق محفوظة.
Close