قرنبيط مشوي مع صوص طحينية. شي كريمي غني على حموضة تجنن و الثوم يا عيني عالثوم. وصفة نباتية، من غير غلوتن و من غير حليب يعني تناسب كل شروطكم اليوم انشالله.
القرنبيط خضار غريب.يعني خضار برائحة بس بلا طعم ما عارفين كيف زابطة معو. بس برضه القرنبيط لمّا ينطبخ صح مع مكونات مزبوطة يطلع معو مفاجآت جديدة. اليوم رح نملحه و نشويه. رح نشويه صح مش نشويه بلا ما يستوي. جربوا طريقتنا مع أسرار شوي القرنبيط و ما رح تندموا.
مزبوط القرنبيط بلا طعم، بس هالشي يخليه لوحة فاضية تحطوا عليها اللي تحبوه من بهارات و صلصات. في ناس عملت منه رز و بيتزا والله! بس احنا خلينا بالبسيط، يعني تشووه، تخلّلوه، (بس لا تحشوه).
مكونات وصفتنا اليوم
أسرار لشوي القرنبيط (و تنفع لمعظم انواع الخضار)
- الحرارة تكون عالية جداً. لا تخافوا. نحمي الفرن بكل جرأة لل٢٣٠ درجة سيلسيوس
- ما تشوو الخضار من البرّاد عطول. تطلعوها قبل بوقت لتوصل لدرجة حرارة الغرفة و هالشي يساعد انه الخضرة تتكرمل صح.
- خمس دقايق قبل ما تحطوا الخضار بالفرن تحمّوا الصينية و هي فاضية بالفرن
- ما تعجقوها. خلّوا الخضرة مرتاحة و مش مكوّمة فوق بعض. لو تكوّموها الخضرة تنسلق بدل ما تنشوى.
- لا تتبّلوا الخضار بالصينية مثل ما يعمل الشيفات على فتافيت. تبلوها على جنب لتتأكدوا الزيت و البهارات توصل لكل القطع.
يللا نعمل سلطة قرنبيط مشوي!
خطوتين: شوي القرنبيط و تحضير الصوص.
نحمّي الفرن لدرجة حرارة ٢٣٠ سيليسيوس. لو قطّعتوا و طبختوا قرنبيط قبل هيك تقدروا تنسوا هالفقرة و تمشوا للفقرة اللي بعدها. لتحضير القرنبيط، نشيل الورق الأخضر و نقص الجذع لتقدر القرنبيطة توقف لوحدها على لوح التقطيع. تقطعوها من النص و بعدين أرباع. تقطعوهامن الداخل مثل حرف v لتشيلوا العرق الكبير. تلاقوا كل الزهرات الصغار هرهروا و وقعوا لوحدهم. قطعوا كل الزهرات لحجم لقمة. حاولوا تعملوا سطح لكل واحدة و انتوا تقطعوها. هالمساحة ممتازة لتتحمّص بالفرن.
نحط كل الزهرات بوعاء و نرش ثلاث ملاعق زيت زيتون، نص ملعقة صغيرة ملح و نص ملعقة صغيرة فلفل. لمّا الفرن يحمى تماماٍ نحط الصينية و هي فاضية بالفرن الحامي لخمس دقائق و بعدين نضيف زهراتنا بزبتهم و ملحهم. و متل ما قلنا بلا ما تكركبوها، اعطوا القرنبيط مساحة شخصية!
نشوي و نحمّر القرنبيط بالفرن لمدة ٢٥ دقيقة أو لحتى يوصل للّون المطلوب. احنا نحبه بلون الكراميل و مستوي تماماً. بعض ما تقطع نصف مدة الشوي نقلبه من غير ما نكسره بملقط.
لنعمل صوص الطحينية
بينما القرنبيط عم ينشوي نحضر صوص السلطة. نضع الطحينة (طبعاً)، الملح، الفلفل، الثوم المهروس و الحامض وزيت الزيتون بطبق و نخلطها جيداً. نضيف مي (ملعقة مياه واحدة كل مرة عند الحاجة) لحتى نوصل لنتيجة كريمية و ناعمة.
للتقديم نبدا بطبقة صوص طحينية بالطبق، فوقها القربنيط المشوي و كمان صوص طحينية فوق القرنبيط و نقدمها مع عصرة ليمونة و رشة بقدونس.
جربوا القرنبيط بالطحينية و خبرونا رأيكم. اتركولنا تعليق. و لو نشرتوا صور لإبداعاتكم لا تنسوا تعملولنا تاغ #thetablediaries
قرنبيط مشوي مع صوص الطحينة
المقادير
- 1 راس قرنبيط حجم وسط
- 3 م.ك. زيت زيتون
- ½ م.ص. ملح
- ½ م.ص. فلفل أسود
لصوص الطحينة
- 6 م.ك. طحينة
- 1 سن ثوم مهروس
- 4 م.ك. عصير ليمون أو حسب الرغبة
- 2 م.ص. زيت زيتون
- 1/2 م.ص. ملح
- رشة فلفل
للزينة
- 2 م.ك. بقدونس
الخطوات
- نحمّي الفرن 230°C سيلسيوس
- لتحضير القرنبيط، نُزيل الورق الأخضر و نقص الجذع. نقطعها من المنتصف ثم لأرباع و نُزيل قلب كل منتصف بالسكين. نقطع العرق بالداخل مثل حرف v لنفصل الزهرات. نقطع الزهرات لحجم لقمة. نحاول نقص كل واحدة بمساحة جانبية لتساعد على التحمير.
- نضع كل الزهرات بوعاء و نرش ثلاث ملاعق زيت زيتون، نص ملعقة صغيرة ملح و نص ملعقة صغيرة فلفل
- نضع صينية من غير القرنبيط بالفرن بعد ان يسخن تماماً لمدة خمس دقائق
- نوزع القرنبيط بالصينية الساخنة و نُباعد بين الزهرات. نشوي ل25 دقيقة و نفلب مرة واحدة بملقط.
صوص الطحينية
- نضع الطحينة، الملح، الفلفل، الثوم المهروس و الحامض وزيت الزيتون بطبق و نخلطها جيداً. نضيف مي (ملعقة مياه واحدة كل مرة عند الحاجة) لحتى نوصل لنتيجة كريمية و ناعمة.
- للتقديم نبدا بطبقة صوص طحينية بالطبق، فوقها القربنيط المشوي و كمان صوص طحينية فوق القرنبيط و نقدمها مع عصرة ليمونة و رشة بقدونس.