طريقة عمل باستا بروشيتا ب 15 دقيقة مع البلسمك المكثف

15 دقيقة بس و تكون باستا البروشيتا جاهزة، هالوصفة نعتقد انها من اسرع الوصفات على حكايات طاولة بس مع بساطتها هي عبارة عن انفجار نكهات. صارت من الوصفات المكررة بالبيت حتى ابني (٦ سنين) صار يطلبها أكثر، و لهالسبب قررت اشاركها معكم. باستا خفيفة و روعة تُقدم ساخنة او باردة.

بس قبل ما ندخل بالطريقة خليني اقلكم من وين جبت هالاختراع. الموضوع ابتدى من وصفة إيطالية مشهورة و هي “سباغيتي اجليو بالزيت” او “spaghetti aglio e olio“  عبارة عن زيت زيتون و ثوم و فلفل احمر ناشف. قررت اضيف الطماطم الكرزية و الريحان لإضافة عناصر طازجة. و البلسمك المكثف لإضافة الحلو (السكر) و اللي هو جزء أساسي كمان لنوصل لطعم متوازن باي وصفة. و قررت اضيف جبنة البارميزان للملوحة و آخر شي جبنة الموزاريلا لاغناء الطبق.

ملاحظات لنتيجة ممتازة:

1. تجنبوا استخدام طماطم مستوية زيادة لأنه رح تطرى من سخونة الطبق و هالشي يخلي بُنية الطماطم مش مثالية لهالطبق.
2. البلسمك المكثف موجود بالسوبرماركت و الهايبر ماركت بس طبعا نعمله بالبيت احسن و اوفر. بياخد ١٥ دقيقة و يعيش بالبراد ٣ أسابيع.
3. لما تعملو مكثف البلسمك ،اتاكدو انه الشفاط فوق الموقد شغال لانه رائحة الخل و هو بيتبخر مش أحلى شي بالبيت.
4. مستوى طهي الباستا: هالملحوظة نفسها لكل أطباق الباستا: تجنبوا غلي الباستا زيادة. إتبعو التعليمات على العلبة و درجة الإستوا أحسن شي تكون (آلدينتي) و هي كلمة إيطالية للتعبير عن الباستا قليلة النضوج.

البلسمك المكثف

مكثف البلسمك يبرز النكهات المختلفة لأطباق كثيرة و يضيف طعم سكري (حلو) للأطباق اللي ينقصها هالعامل. للتذكير: السر لأي طبق او مشروب بطعم معتدل و لذيذ هو التوازن بين النكهات الخمس: المر، الحامض، المالح، المسكر (او الحلو)، و الأومامي.

نرجع لمكثف البلسمك، مكونين فقط (خل بلسمك و سكر بني) و ١٥ دقيقة هو كل اللي تحتاجوه ليجهز هالصوص الروعة و بيبقى بالبراد ٣ أسابيع. ممكن تستعملوه للسلطات، السمك، اللحوم ، و لو متلي و بتحبو تكتشفوا نكهات جديدة؟ جربوه مع آيس كريم الفانيلا.

شو رح نحتاج لعمل هالوصفة

• 

طريقة عمل مكثف البلسمك

نضيف كوبين من خل البلسمك مع السكر بوعاء طبخ لا يتفاعل مع الخل* (ستانليس ستيل ممتاز و تجنبوا الالمنيوم). بعد ما يوصل مرحلة الغليان نخفف الحرارة و نتركه يغلي عالخفيف لمدة ١٥ دقيقة مع التحريك كل شوي. الصوص المفروض يتكثف و يوصل حجمه لكوب (اتذكروا نحن ابتدينا بكوبين). بعد ١٥ دقيقة نتركه يبرد قبل ما وضعه بالبراد بمرطبان مغلق تماما.

لعمل الباستا

نحضر و نقطع كل الخضار اللي بالوصفة. البصل يقطع مربعات صغيرة و الطماطم بالنصف. نفرم الريحان و الثوم. نغلي الباستا أول بعد تحضير الخضار. سلق الباستا يكون دائما بماء مملح زيادة (متل مية البحر) و من غير زيت. اذكر زمان كان من أساسيات سلق الباستا إضافة زيت نباتي مع المي. ليه غلط؟ لانه الزيت يلتصق عالعجين و يمنع الباستا من إنها تتشرب النكهات اللي بالصوص (شو ما كان الصوص و شو ما كانت الباستا الباستا المسلوقة زيادة تعجن بعد إضافة الصوص و هذا يؤثر على بنية الطعام و اللي هو كمان جزء أساسي لأي وصفة متوازنة. و عشان هيك تلاقوا بمقياس السلق على علبة الباستا الوقت اللازم لتوصل درجة نضوج (آلدينتي) و الوقت اللازم للنضج الكامل. تجنبو سلق الباستا لمرحلة النضج الكامل و استعملو الوقت لدرجة (آالديني) لباستا مثالية.

بينما الباستا تنسلق، بطنجرة (او حلة او قدر او مقلاة كبيرة) نضع ربع كوب زيت زيتون و نضيف البصل و الثوم و نقليه دقيقتين مش اكتر مع مراعاة ما يتحول البصل او الثوم للون البني. نشيلها من على النار و نضيف الطماطم الكرزية. ما بدنا الطماطم تنطبخ بس ندفيها شوي.

نضيف الباستا المستوية لخلطتنا و نحرك جيدا مع ملح و فلفل حسب الرغبة، الريحان و جبنة البارميزان

للتقديم (خطوتي المفضلة) نقسم الباستا بالاطباق: اول شي الباستا و نحاول نقسم الطماطم قسمة عدل. نضيف جبنة الموزاريلا و نرشها بشوية زيت زيتون و الفلفل الأحمر الناشف. و آخر شي البلسمك المكثف رشة خفيفة حسب الرغبة (انا شخصيا احبه و بكتر منه) و صحتين و عافية.

• 

للتقديم كسلطة

كل شي مثل ما سبق بس لما تخلص نحطها بالبراد. قبل التقديم نحرك الوعا جيدا و نضيف شوي زيت زيتون.

جربوها و ننصحكم بالبلسمك المكثف معها! لو جربتوه خبرونا شو رأيكم. اتركو تعليق بالاسفل و اعملو تاغ على انستغرام #thetablediaries